ఆపన్నివారక హనుమా!

సుగ్రీవుని భయము బాప బ్రహ్మచారివై  పరబ్రహ్మము
ను చేరి మైత్రీ భంధం నెరపితివి  మా  భయము తీర్చి
పరబ్రహ్మము ను చేర్చ మాకభయ మొసంగవేలనే  
కిరణేశ్వరి ప్రియ నందనా ! ఆపన్నివారక హనుమా!
 
రామ దయను రాజ్యము పొంది రమణుల
 పొందులో ఏమరిచి   మిత్ర కార్యము
 మరచిన  కపి రాజును హితవచనముల
 మేల్కొలిపి  శేషుని శర పరంపరల
 బడనివ్వక కాచిన  బుద్దిమతి మము
 యమ పాశముల  పాల్బడనీయక  పాలించవే
కిరణేశ్వరి ప్రియ నందనా ! ఆపన్నివారక హనుమా!

అమ్మ అన్వేషణకై  కపి మూకను పంపు వేళ అయ్య 
మదికేమి తోచనో అంగుళీయకము నీకిచ్చెనయ్య
అంతటి ఘనుడవు మాకిన్చుక ఘనత నీయవే
కిరణేశ్వరి ప్రియ నందనా ! ఆపన్నివారక హనుమా!

సాగరం  లంఘించు  సమర్ధుడెవ్వడోయని
కపి వీరులేల్లరు కలత చెందు వేళ  గురు
వృద్ధుడు  జాంబవంతుని చే జాగృతి నొందిన
జవసత్వములచే ఉప్పొంగితివి కృంగిన మా
నవనాడుల జాగృతి తో పొంగించవయా
కిరణేశ్వరి ప్రియ నందనా ! ఆపన్నివారక హనుమా!

రామ కార్యము సాధించబోవు సదవకాశము చిక్కెనేయను
 తలంపు తనువు తాకగ  నే   పొంగిన ఎదతో సింహనాదము
 చేసితివి సత్కార్యములవైపు మము నడిపించవే
కిరణేశ్వరి ప్రియ నందనా ! ఆపన్నివారక హనుమా!

లక్ష్య సాధనలో అలసత్వము కూడదనుచు మోహింప
 చేయు మైనాకుని ఆహ్వానం తోసిరాజంటివి మము
కమ్ముకున్న మోహబంధనాలేల  తెంచకుంటివి
కిరణేశ్వరి ప్రియ నందనా ! ఆపన్నివారక హనుమా!

మ్రింగ నెంచి నాగమాత నోరు పెంచగా అదను  చూసి
అంగుష్ట మాత్రమున అంగిట చేరి వచ్చిన బుద్దిమతి
ముంచ నెంచు కష్టముల కడలి దాటు బుద్ధి మాకొసగవే 
కిరణేశ్వరి ప్రియ నందనా ! ఆపన్నివారక హనుమా!


నీడను పట్టి నిలువరించు సింహికను చేబలముతో
సాగరమున ముంచితివి నిస్సత్తువ ఆవరించిన
మా నరములకు సడలని సత్తువ నివ్వవే
కిరణేశ్వరి ప్రియ నందనా ! ఆపన్నివారక హనుమా!

గోలోక బృందావనం

గోలోక బృందావనం
అత్యున్నత ఆధ్యాత్మిక ధామం
సాక్షాత్ ఆ గోవిందుడు నివసించే దివ్య ధామం

ఆ లోకాన్ని చేరుకోవటానికి అతి సులభమార్గం ఆ చిన్ని కృష్ణుని పాద పద్మాలపై నిశ్చలమైన ప్రేమ
ఆ లోకపు వర్ణన మన మాటలకు  అందేది కాదు అక్కడ మనసులు పొందే అనుభూతి అనుభవించటానికే తప్ప వివరించటానికి సాధ్య మయ్యేది  కాదు
అక్కడికి చేరుకోవటానికి సాధన అవసరం . ఒకసారి చేరుకున్నమా ఇక వెనుతిరిగే అవసరమే రాదు
హద్దులు లేని సంతోష సాగరం లో విహారమే ప్రతి క్షణం
ఒక్క సారి ఆ గోలోకపు సౌందర్యాన్ని వీక్షిస్తే
దినమంతా ఉదయకాలపు సౌమ్యత తో కూడిన వెలుగులే తప్ప తీక్షణత తెలియని భానుడు
సాయం వేళ వృద్ది తప్ప క్షయమేరుగని వెన్నెల రేడు చందురుడు చిందించు పసిడి కాంతులు
భూమాత ఆకుపచ్చని చీర కట్టుకుందా అనిపించే పచ్చిక బయళ్ళు
ఆకాశాన్ని  ముద్దాడుతున్నాయా అనిపించే పర్వత శిఖరాలు
ఆ పర్వతాలపై గంధపు వాసనలతో మైమర్పింప చేయు చందన వృక్షాలు
ఆ పర్వత శ్రేణుల పై నుండి జల జల జోరుతో జాలువారు జలపాతాలు
పర్వతాల నడుమ నుండి హోయలోలికిస్తూ గల గల సవ్వడుల తో సాగే నదులు
 
ఘనమైన హృదయ భారం మోయలేక వంగిన నాజూకు నడుము కల నవయవ్వనవతి లా
మధుర రసాలు స్రవించు ఫల భారం తో వంగిన కొమ్మలు గల వృక్షాలు
సౌగంధికా పరిమళాలు వెదజల్లు పారిజాతాలు  మల్లెలు , సుకుమారులైన సన్నజాజులు
రాచ టీవి ఒలికించు గులాభిలు , ముద్దొచ్చే మందారాలు  ముద్దబంతులు తో కూడిన పూల వనాలు
సువాసనలు వెదజల్లెడు తులసి వనాలు
నలుపు ఎరుపుల వర్ణ మిశ్రమంతో కూడిన గోమాతల అంబా రావాలు
చెంగు చెంగున గెంతే లేగ ల పదఘట్టన ల తాకిడికి ఎగసిన ధూళీ తో
ఎర్రని మేఘమేదొ కనుల ముందు పరుచుకుందా  అనిపించే  ధూళీ మేఘాలు

అబ్బ అంతేనా
నిర్మలమైన సరోవరాలు ఆ  సరోవరాలకు నిండు తనమిచ్చిన కలువ బాలలు , కమలపు విరిబోణులు
ఆ పద్మాల హృదయ మకరందం కోసం విచ్చేసిన ఝుంటి తుమ్మెదల ఝుంకారాలు
రూప సౌందర్యంలో ఆ గోవిందుడి సారూప్యత పొందిన గోపాలకులు
 లలిత లావణ్యం తో ముగ్ధ మనోహరం గా నిత్య యవ్వనంతో శోబిల్లు గోపాంగనలు
చెవుల కింపుగా సాగే ఋషుల వేద గానాలు
మనసును రంజింప చేయు గంధర్వుల గానాలు కిన్నెరా కాంతల నాట్య భంగిమలు

నిరంతరం మృదు మధురంగా మేను తాకుతూ పూల  సువాసనలతో పాటుగా మానస చోరుడు
వెన్నదొంగ  వెన్నుని వేణు నాద తరంగాలను మోసుకొచ్చే వాయు లీనాలు  
ఇంతటి రసరమ్య మైన సుందర నందన వనాలతో కూడిన ఆ బృందావని లో
కవుల కల్పనలకు అందని ఆ రాదా  కృష్ణుల  ప్రణయ కావ్యాన్ని చూచి తీర వలసినదే
ఆ గోవిందుని పాదాల చెంత నిరపేక్ష నిరపాయ నిశ్చల నిర్మల మధురానుభూతులు పంచె
జీవితాన్ని కోరుకోవటం కోసం తపిద్దాం

నందమూరి తారక రామా

1960 తెలుగు నాట మరువ లేని సంవత్సరం
ఏడుకొండలపై కొలువైన వేంకటనాధుడు  వెండి తెరపై దివ్య దర్శన మిచ్చిన సమయం

 శ్రీనివాసుడే కదలి వచ్చాడా  అని సంబ్రమాశ్చర్యాలతో వూరు వాడా పిల్లా పెద్ద అందరిని ఏకం చేసి చద్ది అన్నపు మూటలు ఎడ్ల బండ్లకు వేలాడ గట్టి   తన వైపుకు ఆకర్షించుకున్న ఆ సుందర రూపం
ఎవరీతడు  ఏమా అద్భుతమైన చిరు దరహాసం

ఒక్కసారి ఆలోచిస్తే అంతకు ముందు  37 సంవత్సరాల క్రితం  1923 మే 28 న
నిమ్మకూరు లో వెంకటరామమ్మ లక్ష్మయ్య దంపతులకు జన్మించిన ఓ చిట్టి బుడతడు   
ఇంతితై వటుడింతై వెండితెరపై తరగని వెలుగై రాజకీయ యవనిక పై చెరగని సంతకం చేసి
తెలుగు జాతి పేరు ప్రఖ్యాతులు ఇనుమడింప చేసే వరకు  సాగించిన జీవన ప్రస్థానం అందరికి
ఆదర్శ ప్రాయం
ఆయనే నందమూరి తారక రాముడు 

శ్రీరాముని సౌందర్యాన్ని శ్రీకృష్ణుని లీలా విలాసాలను
రావణుడి రాజసాన్ని సు యోధనుడి అహాన్ని కర్ణుడి దాతృత్వాన్ని

ఇచ్చిన మాటకు కట్టుబడే భీష్ముని ధీరత్వం అర్జునుడి సమరశీలత
 శ్రీకృష్ణ దేవరాయలి సాహితీపిపాస  తల్లి తండ్రుల పట్ల పుండరీకుని సేవా నిరతి
 వీర జవాను దేశ భక్తి చెల్లి పట్ల అన్న కుండే ఆపేక్ష
ఇన్ని గుణాల కలబోసి రూపుదిద్దుకున్న నిండైన రూపం
నందమూరి తారక రాముడు 

అవన్నీ ఆయన సహజ గుణాలు కనుకే వాటిని తెరపై ప్రదర్శించినపుడు
నిజమే ననుకున్నారు కాని నటన అనుకోలేక పోయారు  

ప్రత్యేక ఉద్యమం ఎగసి పడుతున్న వేళ
రాజకీయ వాసనలేవి దరి చేరని నాడే సొంత లాభం కన్నా తెలుగు జాతి క్షేమమే
ముఖ్యమని సొంత చిత్రం లో తెలుగు జాతి మనది నిండుగా వెలుగు జాతి మనది అంటూ 
కలసి వుంటే కలదు సుఖమని చాటిన ఘనుడు
మనుషుల లోని సంకుచిత భావాల పునాదులపై తమ అధికార పునాదులు నిర్మించుకునే నాయకులెవ్వరూ
తేరిపార చూడలేని మేరునగ ధీర గంభీరుడు 

 
తెలుగు వారికి రాజకీయ ఓనమాలు దిద్దించిన గురువు
కష్టకాలంలో జోలె పట్టి ఆపదలో వున్న వారికి కలసి కట్టుగా  సహాయ పడే తత్వాన్ని
అలవాటు చేసిన మహానుభావుడు
ఇలా చెప్పుకుంటూ పొతే మనకు అలుపు రావాల్సిందే కాని ఆయన గొప్పతనానికి తరుగు రాదు

భగవద్గీతను చదివి అర్ధం చేసుకోవాలే కాని యుద్దానికి ముందు అది చెప్పటం సాధ్యమా అని వ్యర్ధ ప్రశ్నలు సంధించటం అవివేకం

యుగ పురుషుల జీవితాలు అంతే

విమర్శించు  వారు వేవేలు అందురు గాక ఆయన జీవన ప్రస్థానాన్ని అర్ధం చేసుకుని
ఆ గుణాలను అలవర్చుకోవటానికి ప్రయత్నించేవారు విజయశిఖరాలు అందుకునే తీరతారు

అపర భీష్మావతారా  నందమూరి తారక రామా 

 ప్రేమతో మీ 

నరుడు నవగ్రహాలు

నరుడు నవగ్రహాలు
జీవనం యాంత్రికమై మనసు దుర్భలంగా మారిన

   కాలం లో
అననుకూల పరిస్థితులకు తాళలేక వాటిని గెలవ లేక గ్రహ శాంతుల కోసం
నవ గ్రహాల చుట్టూ పరిబ్రమించటం నేడు సర్వ సాధారణమయ్యింది.
  
మరి ఈ నవ గ్రహాలను శాంతింప చేయటమెల 
అసలు నిజంగానే నవగ్రహాల ప్రభావం మన మీద ఉంటుందా
ఒకరు  ఈ దానాలు చేయండి అని చెబుతారు
మరొకరు ఈ జపాలు చేయించండి అంటారు
ఇవన్నీ మనకు అనుకూలిస్తాయా 
ఎంతో కొంత ధనం ఇస్తే ఓ పండితుడు చేసే జపం మన గతిని మారుస్తుందా
అసలేమిటి ఈ నవ గ్రహాలూ ఎక్కడ వున్నాయి ఎక్కడో వుండి మనలను
ప్రభావితం చేస్తున్నాయా

పరిశీలనం చేస్తే మనలోనే ఈ నవ గ్రహాలూ వున్నాయి మనలను ప్రభావితం చేస్తున్నాయి
నవగ్రహధిపతి  సూర్యుడు    ఆకాశ వీధిలో తిరుగుతూ సమస్త ప్రాణ కోటికి చైతన్యం ఇస్తున్నట్లే
మన శరీరం లోను వెన్నుపూస మొదలయ్యే చోట చిన్న జ్యోతి రూపం లో నిలిచి
మన ప్రాణ జ్యోతి నిలబెడుతున్నాడు
మనః కారకుడైన చంద్రుడు మన మెదడు ను ప్రభావితం చేస్తూ అక్కడ  వున్నాడు
(చంద్రుని కళల ను అనుసరించి సముద్రపు అలలు ప్రభావితమినట్లు ఆ సముద్రపు తీరును పోలిన మన మనసు చంద్రుని చే ప్రభావిత మవుతుంది )  
భూమాత పుత్రుడైన కుజుడు మనలో ప్రసరించే శక్తి రూపం లోను
మన యొక్క సౌమ్య గుణ రూపంలో బుదుడు, బుద్ధి రూపకం గా బృహస్పతి  
సుఖాపేక్ష భావనా రూపకం గా శుక్రుడు , మనం చేసే పనుల కారణం గా సంభవించే ఫలితాల
రూపకంగా శని, మన శ్వాసను నియంత్రించే సర్ప రూప నాడులుగా రాహు కేతువులు మనలోనే
నిలిచి వున్నారు   
మనలో నిలిచి మనలను ప్రభావితం చేసే నవగ్రహాలను మనకు అనుకూలం గా మార్చుకోగల అవకాశం
లేదా వాటి ప్రతికూల ప్రభావాలు తగ్గించుకునే మార్గం మన చేతుల్లోనే వుంటుంది 

లోకం మొత్తం అక్షరం మీదే ఆధారపడి వుంది. అక్షరాన్ని శబ్దం గా మార్చి క్రమ పద్దతిలో దానిని ఉపయోగించటం ద్వారా మన పూర్వీకులు అద్బుతాలు సృజించారు .  ఆ స్థాయిలో కాకపోయినా నేటి మనిషి ఉపయోగించే ఆధునిక పరికరాలు (కంప్యూటర్, మొబైల్ )  ఆ అక్షరం  శబ్దం మీద ఆధార పడినవే .
మనం కూడా అదే అక్షరాలను వుపయోగించి మనలో నిలచిన నవ గ్రహాలను మనకనుకూలం గా మార్చుకోవచ్చు
ప్రతి రోజు సూర్యోదయానికి ముందు ఓ 40 నిమిషాల పాటు ప్రతి రోజు క్రమం తప్పకుండా మనకు నచ్చిన
భగవన్ నామాన్ని జపించటం ద్వారా  మనలోని చైతన్య జ్యోతిని ప్రజ్వలింప చేసుకుని తద్వారా వుత్పన్నమయ్యే అనుకూల తరంగాల ద్వారా నవ గ్రహ ఫలితాలను నియంత్రించుకోవచ్చు 
 అనవసర ఆందోళనలు నానా విధపు ప్రయాసలు వీడి వేద ప్రతి పాదితమైన భగవాన్ నామాన్ని పదే పదే స్మరించటం ద్వారా ఉత్తమ ఫలితాలు పొందవచ్చు
(సూచన : ఇదంతా నా ఆలోచన ద్వారా నాకు కలిగిన భావాల సంపుటి. ఇది అర్ధ రహితమైనది గా విజ్ఞులు భావిస్తే క్షంతవ్యులం ) 

హనుమ ఓ అర్ధం కాని ప్రశ్న

హనుమ ఓ అర్ధం కాని ప్రశ్న
హనుమాన్ ఓ సుందర రూపం మనసును ఇట్టే ఆకర్షించే దైవం
వయసుతో నిమిత్తం లేకుండా అందరు ఇష్ట పడే తమ వాడి గా భావించుకునే ఓ ఆత్మీయ నేస్తం
ఆయనేమీ శ్రీరాముని వలె ఆజాను బాహుడు కాదు తామర రేకుల వంటి కనులు కల వాడు కాదు
శ్రీకృష్ణుని వలె పారిజాత సుమాలను ధరించి కస్తూరి పరిమళాలతో ఒప్పారు లలితమైన దేహ సౌందర్యం కల వాడు కాదు

ఓ వానరుడు మరి నరులనే కాదు నానా రకాల జీవాలను సైతం ఎలా తన వైపు ఆకర్షించుకోగలుగుతున్నాడు  

అంటే మన మనసులను ఆకర్షించేదేమిటి శారీరక సౌందర్యమా లేక వ్యక్తిత్వపు సౌందర్యమా
శారీరిక సౌందర్యమైతే   హనుమ వైపు మనసు ఎందుకలా పరుగులు తీస్తుంది
ఆయనను చూడగానే మనసులో ఏదో తెలియని ఆత్మీయ భావం ఉప్పొంగుతుంది
పరిశీలిస్తే ఆయన వైభవమంతా ఆయన మాట తీరు లోను నడవడిక లోను అడుగడుగునా ప్రతిఫలిస్తుంది
మనం మాట్లాడితే మన మాటకు ముఖం లో కనిపించే భావాలకు పొంతన వుండదు
ఎదుట మనిషి ముఖం లోకి చూస్తూ ఓ నిమిషమైన మాట్లాడలేము
కాని ఆయన మాట్లాడిన మొదటి సారే శ్రీరాముని చేత ఇంతటి వ్యాకరణ పండితుడు మరొకరు లేరని
కితాబు నిప్పించుకోగాలిగారు
స్పష్టత తో కూడిన మృదువైన వాక్కు , ఎటువంటి వికారాలు పలికించని ముఖ కవళికలు ఆయన సొంతం
సమయానుకూలం గా ఎల్లపుడు హితకరమైన వచనాలు పలుకటం , మాటలో వినయాన్ని ప్రదర్శించటం
ఎంత సాధించిన అహంకారం దరి చేర నీయకుండ అణుకువతొ వ్యవహరించటం
చే పట్టిన పని మీద అమిత శ్రద్ద ఆసక్తి కలిగి వుండటం , మద్యలో ఎటువంటి ఆకర్షణలు కలిగినా లొంగక పోవటం  
చక్కని విషయ పరిజ్ఞానం కలిగి వుండటం , సమయోచితమైన సలహాలు ఇవ్వగల నేర్పు ఇవన్ని ఒక్క మనిషిలో చూడాలనుకుంటే ఆ రూపమే హనుమ

ఒకానొక వేళ ఇంద్రుడు అర్జునుడు గరుడుడు ఆదిశేషుడు  ప్రహ్లాదుడు వీరంతా అహంకరించిన వారే
కాని అహంకారమన్నది దరి చేరని ఒకే ఒక్క మూర్తి హనుమ
ఆయనలోని సుగుణాలన్నీ ఆయన దేహాన్ని కాంతివంతం చేసి మనలను ఆయన వైపుకు ఆకర్షించు కోగలుగుతున్నాయి. మనం కుడా ఇలాంటి సుగుణ సంపద పెంచుకుంటే మన దేహాలు కూడా కాంతి పుంజాలై  వెలుగొందుతాయి 
మల్లెల పరిమళాలను అక్కడ ప్రసరించే వాయువు ఆ ప్రాంతమంతా వ్యాపింప చేసినట్లు
మన మనసులోని ఉదాత్త భావాల పరిమళాలను మన లో చరించే వాయువు మన దేహమంతా వ్యాపింప చేసి మన శరీరాలను ఆకర్షణీయం గా చేస్తుంది.
శారీరిక సౌందర్యపు ఆకర్షణ తాత్కాలిక ఉద్రేకం లోనుండి పుడుతుంది అది నిలిచేది అతి కొద్ది కాలం
అది సంతోషాన్ని ఇవ్వలేదు

కాని వికసించిన వ్యక్తిత్వపు సౌందర్య ఆకర్షణ ఎవ్వరినైన ఇట్టే కట్టి పడేస్తుంది . కలకాలం నిలిచి వుంటుంది
ఇదే హనుమ మనకు నేర్పేది..... నా అర్ధం కాని ప్రశ్నకు హనుమ ఇచ్చిన అర్ధవంతమైన సమాధానం

మాధవీ పరిణయం

మాధవీ పరిణయం 

అన్నా !

 

పెళ్ళికి ఎందుకు రాలేదు ?

 

ఈ  ప్రశ్న అడగరానిది కదా ,

 

చెల్లి జీవితంలో భాగం కాబోతున్న అందమైన ప్రపంచానికి శుభాహ్వానం 

పలుకుతూ జరిపే మహోత్సవాన్ని చూడకుండా ఎ అన్న అయినా వుండగలడా 

 

 మరి ఎందుకు అడిగినట్లు 

ఎపుడో కార్తీకం లో బవిరి గడ్డం తో చూసిన ముఖం . మద్యలో కొన్ని కార్తీకాలు కరిగిపోయిన తరువాత తిరిగి 

కార్తీకంలో జరుగుతున్న ఈ ఆనంద సమయంలో  అనేకానేక ఆత్మీయ అతిదేయుల మధ్య చుసిన వేంటనే 

గుర్తించాలంటే కష్టమే మరి 

 

పెళ్లి జరిగిన బహుకొద్ది రోజులకే ఫోన్ చేసి ప్రశ్నిస్తున్న చెల్లి ఆప్యాయతకు మురిసిపోతూ కాలాన్ని  ఒక్కసారి వెనక్కి త్రిప్పితే 

 

 

నవంబరు 9 శనివారం సాయంత్రం 8 గంటలు  ఆకుపచ్చని ఉద్యానవనం అనే పూటకూళ్ళ ఇల్లు (గ్రీన్ పార్క్ హోటల్ అమీర్ పేట్ )

 

 చల్లని రాతిరి సమయాన చల్లని దారుల వెంట నడుచుకుంటూ చల్లని గదిలోకి ప్రవేశించి ముందు వరుసలో ఆసీనులైన వారిలో  చెల్లి కోసం చూపులు  ప్రసరింప చేసి చూపుకు చిక్కక పోవటంతో  అందివచ్చిన   చల చల్లని పానీయం  అందిపుచ్చుకుని వెనుక వరసలో చతికిలపడ్డాను 

 అలా ఒక్కసారి తలత్రిప్పి అపరిచితుల  మద్య సుపరిచితులకై వెదుకులాడుతున్నంతలో   అతిధులను ఆప్యాయంగా పలకరిస్తూ అమ్మ కనిపించింది

దగ్గరకు వెళ్లి అమ్మా నే కిరణ్
ఓహ్ కిరణ్ బాగున్నావా చెల్లి పైన గదిలో  వుంది వస్తుంది కూర్చో  ఆదరంతో కూడిన సమాధానం 
హమ్మయ్య గుర్తు పడతారో లేదో నన్న సందేహం తీరి గుర్తున్నానన్న ఆనందం

 

 కూర్చుని చూపులను ముందుకు సారిస్తే ముందు వరుసలో గింగిరులు తిరిగిన ఉంగరాల జుట్టుతో రాబోయే నవ వధువు ను చూడటానికి వున్నా రెండు కనులు సరిపోవని బింబాన్ని ప్రతిబింబింప చేయు మరో రెండు చక్రాల వంటి అద్దాలను ఆసరా chesukuni   గోధుమ వర్ణానికి చెందిన రంగుతో చూడ చక్కగా వున్న షేర్వాని (పేరు ఏదైనా సర్దుకు పోండి) ధరించిన ఓ యువరత్నం

ఓ ఇతడే మాధవ హరుడు హరిహరుడు కాబొలు , కాబోలు ఏమిటి ఇతడే పోల్చుకోవటం పెద్ద కష్టమేమి కాదు

ఇంతలో మంగళ వాయిద్యాల ధ్వని
ఓహ్ చెల్లి రాబోతున్నదన్న మాట
చంద్రిక వర్ణపు (పింక్) చీరలో నడిచోస్తున్న చందమామ లా చిరు సిగ్గులు బుగ్గలపై పూయిస్తూ అందమైన కొప్పుతో అలా నడిచి వస్తున్న మా చిట్టి తల్లిని చూసి మురిసిపోతూ నుంచున్న

 ఇంతలో పంతులుగారి హడావుడి మొదలయ్యింది
అదే ఎదురుకోలు ఉత్సవం
యువరాజా వారు రాచ టివీ ఒలికిస్తుంటే యువరాణి పరివారం నును సిగ్గులు ఒలికిస్తూ ఆహ్వానం పలకటం
పంతులుగారు జాబితా విప్పారు ఎవరెవరు వచ్చారో ఈ వేడుకకు మనము చూద్దామా

అంగ వంగ కళింగ మత్స్య మగధ మాంచాల కోసల కాంభోజ కాశ్మీర  గాంధార కురు విరాట పాంచాల మల్ల చేది  మొదలుగా గల సంస్థానధీశు లెందరో విచ్చేసిన ఈ స్వయంవర మంటపం లో ............ 
దండధరులైన  ఉద్దండులెన్దరున్న కోదండధారి యగు రాముని కే జానకి వరమాల        
హరిహరుడే మాధవ మానస చోరుడు        

 కాలం మారింది దానితో పాటే ట్రెండు మారింది ఆశ్వ రధారూడులై రావాల్సిన రాచ పరివారం
 కార్లలో కొలువు చేరింది
సరే సరే తరువాత
పంతులుగారు ద్విపాత్రాభినయం చేస్తున్నారు అబ్బాయి తరుపున అమ్మాయి తరుపున
బింకం ప్రదర్శిస్తూ అబ్బాయి వైపుకు ఒక అడుగు మాత్రమే వేయమని అమ్మాయికి
మనసులోని ఆతృతను అదిమి పట్టి అమ్మాయి వైపుకు రెండు అడుగులు వేయమని అబ్బాయికి
చుట్టుప్రక్కల మూగిన బంధు గణపు చెణకులు ఏమైనప్పటికీ ఇందులోని అంతరార్ధాని తెలుసుకో యత్నిస్తే ......  

అమ్మాయి వేసే తోలి అడుగు .... వరుడి వంశం లోని గడచిన ఏడు తరాలవారిని ఉద్దరించటానికి  రాబోయే ఎడుతరాలపాటు వంశ వృక్షాన్ని నిలబెట్టటానికి నీకు ఆధారమై నిలుస్తానని సంకేత సూచిక       
అమ్మాయి వేసే రెండో అడుగు...... సమస్యల సాగరాన్ని ఈదుతూ అలజడి నొందు నీ మనసుకు స్వాంతన నిచ్చు నిర్మల నదీతుంగా ప్రవాహమై నీతో జీవితకాలం నడిచోస్తానని సంకేతం
అమ్మాయి వేసే మూడో అడుగు .... జీవిత పరమార్ధాన్ని తెలుసుకునే యత్నంలో చేయు వేదోక్తమైన కర్మాచరణకు చేదోడుగా నిలుస్తానని ఇచ్చే హామీ

అందుకే స్త్రీ వేసే ప్రతి అడుగు ఎంతో ఔన్నత్యం   తో   కూడి వుంటుంది

అదే స్త్రీ యొక్క గొప్పదనం
అందుకే వివాహ బంధం
అందుకు మగవారికి ఆడతోడు అవసరం

ఆ సంబరం ముగిసి వధూ వరులిద్దరూ వేదికపై ఆసీనులవటం
పెద్దలు అతిథులు ఆశీర్వచనాలు పలకటం మామూలే కదా

నేను వేదిక నెక్కి అక్షితలు వేసి క్రిందకు దిగుతుండగా మా కెప్టన్  గారు ఆనందాంతరంగులై   వేదిక ప్రక్కనే

 ఇందు వివాహ సమయంలో గడకర్రల వంటి పొడగరుల  మద్య నుండి ఆ వేడుక చూచి ఆనందించటానికి విఫల యత్నం చేసిన వామనుడు నేడు త్రివిక్రముడై గోలోకం నుండి  మాధవి పరిణయాన్ని చూస్తూ మురిసిపోతూ ఆ మాధవుడి పాదపద్మాలపై నిలిచివున్న మల్లి మందారాలను తీసుకుని మాధవ హరులపై   పుష్ప వర్షాన్ని కురిపిస్తున్న దృశ్యం కడు రమణీయం (గమనించితివా )

 

 

ఆ వేడుక అలా కొనసాగుతుండగా ఆరుబయట సిద్దంగా వున్న వేడి వేడి కమ్మని పదార్ధాలు ఘుమ ఘుమ లాడుతుండగా విందారగించి (తిని చాల కాలమయింది కదా పెరుగు వడలు మాత్రం బాగా గుర్తున్నాయి) తిరుగు పయనమయ్యాను

తొలి అంకానికి తెర దించి      మలి అంకానికి తెరలేపుతుండగా 

గజ రాజ రక్షకా! శ్రీహరీ

సోమరి సర్పం కాళ్ళను  కామ సర్పం బుద్దిని పెన వేసి

 గమ్యం కానక అడుగు పడక  అల్లాడుతూ నారాయణ

 నీ  నామ స్మరణయే ఊతముగా  సాగనెంచిన నాపై

 నీ దయా దృష్టి నేల నిలపవో గజ రాజ రక్షకా! శ్రీహరీ  

 

మోహ అహంకారాగ్నులు దేహాన్ని దహించు చుండ

గోవిందా నీ తలంపుల తుంపరలతో తనువుకు  

స్వాంతన కలిగించ తపించు నాపై

నీ దయా దృష్టి నేల నిలపవో గజ రాజ రక్షకా! శ్రీహరీ  

 

ములుకుల వంటి పలుకులతో చిద్రమైన మది

ముకుందా నీ ముసి ముసి నగవుల మోము గని

మురియ యత్నించు వేళ నాపై

నీ దయా దృష్టి నేల నిలపవో గజ రాజ రక్షకా! శ్రీహరీ  

 

భాద్యతల బరువు మోయలేని అశక్తత తో బ్రతుకు

బండి భారమైన వేళ వేంకట రమణుడా  బరువు

పంచుకోమని వేడ నెంచిన నాపై

నీ దయా దృష్టి నేల నిలపవో గజ రాజ రక్షకా! శ్రీహరీ  

 

ఈశ్వర స్మరణతో ఉదయము భగవత్ సేవ యందు దినము

హరుని అర్చన తో సాయం  రమణీయమగు హరి కధా శ్రవణంబున

రాత్రి గడుపు భాగ్యం ఒసగుమని కోరు  నాపై

నీ దయా దృష్టి నేల నిలపవో గజ రాజ రక్షకా! శ్రీహరీ